Naglawig sa Dagat-Dugo

Nagbarog ko karon niining buslotong sakayan nga naglawig sa dagat-dugo. Nagdilaab tibuok kong lawas, mihapuhap sa akong panit ang kainit. Karon nagpadung ko sa nasod diin ang mga pinutol nga pusod dili madugta, diin ang mga batan-on gilutas sa gugma ug gimatuto sa kalimot. Didto, magpaabot kanako ang kaugmaon sa silaw sa adlaw ug matod sa akong katiguwangan dili ko uhawon sa dugos sa kangitngit. Katingala ang mihagwa karon sa akong mga mata: Nagdis-og ang sakayan bisan walay sulog, walay hangin nga nagtayhop. Nagdis-og bisan wala ko nagbugsay. Sa kalit lang, ang kayo nahimong mga bildong langgam. Nanglupad sila. Nagisi ang kapunawpunawan. Ang dagat-dugo mitin-aw na. Nanamin ko sa tubig ug inanay nagkahanap akong panan-aw. Usa na lang ka pamilok ang kahangtoran.