Panagtagbo

Nagtagbo mi sa akong anino taliwala sa desiyerto usa ka udtong tutok. Gitunol nako akong tuong kamot, apan ang akong anino milingo-lingo. “Walhon ko,” segun niya. Busa, akong gitunol akong walang kamot, apan wala gihapon niya dawata. “Wala pa diay ka makaila sa imong kaugalingon?” Miyango ko. “Bantog rang wala na ka makatultol sa imong lugar. Balikon to nako atong dapit.” Gitubag ko siya: “Walay pulos ang pagbalik sa tanang mong gipangtalikdan kay nagpahipi na sila sa unahan.” Mingisi ang akong anino ug mibungat sa iyang kataposang pamatbat sa wala pa ko hingpit biyai: “Baliki ang tunob nga wala namugna sa imong duha ka tiil.”