After Arkaye Kierulf’s Horses
Ta cre yo na silencio,
cae aqui escondido el maga palabra;
el tantiada de un nana y con el dolor,
cae el maga cosas bueno, pirmi escondido;
amo este el rason por el pensamiento
que dificil el mundo; sino el deberas,
necita sabe lang tu busca con el secreto.
Ta cre yo na creada, cae este como
tomada de agua. Y cae el verdad
ta depende na de aton pensada
si bastante para canaton el un poco
aroz y alegria. Ta cre yo si ta agara tu mano,
ta puede tu sinti con el agua ta tantia
na maga sakate cada vez tan ulan;
Y el maga cuento de tu tata ta relata
ta queda maga pajaro ala mañana.
Na maga dia que perde de tuyu camino,
cre cae no hay camino no hay pordonde
y sabe cae el sol nunca desaparece.
Ta cre yo cae el corazon un balutan
y itu, cargando tu el risas y sonrisa
del maga pono que puede apacigua
el tristeza del tierra. Un dia, no hay cancion
que puede habla con tigo si kosa el secreto
y si por que tu necesita poesia. Ta cre yo
con el dignidad del de aton maga sueno.
Ta cre yo con el amor y cae este el verano.
Ta cre yo con sabiduria sin tiempo. Con el ahora.
Y con el de aton ultimo descanso.
