Naroon ang mga kasangkapan
kung paano iniwan. Walang imik
ang mga lansangang naparam
sa gitna ng paglikas.
Dumaluhong ang kumukulong abo,
bato, mga siglo—
Lumambong
sa balangkas ng lungsod.
Lumikha ng hugis-taong guwang
sa sapin-saping tining
ang mga naglahong katawan.
Walang nag-alala
o nakaalala. Mangmang ang bagong salta
sa mga hiwatig ng lupa.
Nang sa wakas bungkalin,
ito’y upang magpunla,
hindi hanguin ang labí.
Walang iniwang bakas
ang mga tunog
mula pagsambulat
hanggang huling singap.
Nanatiling nakabaon
ang kanilang mga tili.
Sa ibabaw,
namimintog ang mga uhay.
